19
Alam semesto jugo ajaran Allah nónjókke kemulyoan-Nyo
1 Catetan óntók pemémpén pujian: Saér nyanyian ni dari Daód.
2 Semesto alam nyeritoke kemulyoan Allah,a
jugo langét nyatoke pebuatan tangan-Nyo.
3 Ari neróske brito tu ke ari berékótnyo,
jugo malem nyampeke pengetauan tu ke malem berékótnyo.
4 Katek omongan, katek kato-kato;
suaronyo jugo idak tedenger.
5 Tapi kabarnyo tesebar ke slóró bumi,
trós pesennyo sampe ke ójóng dunio.
Di langét, Dio negakke kemah óntók matoari,
6 trós matoari móncól, pecak pengantén lanang yang metu dari kamarnyo,
semangat pecak atletb yang nak mulai larinyo.
7 Terbétnyo dari ójóng langét
trós belari sampe ke ójóng laénnyo;
katek yang teléndóng dari panasnyo.
8 Ajaran ALLAH tu sempurno,
nyegerke jiwo.
Pejanjian ALLAH tu tegó,
mbékén wong polos jadi behikmah.
9 Petónjók ALLAH tu pacak dipecayo,
nyenengke ati.
Prénto ALLAH tu murni,
jadi penerang óntók mato.
10 Tóndók dengen takjób samo ALLAH tu suci,
ado óntók selamo-lamonyo.
Peratóran-peratóran ALLAH tu bener,
adél slórónyo,
11 lebé berego daripado emas,
ngelebéi banyak emas murni.
Peratóran-peratóran tu lebé manis daripado madu,
ngelebéi tetesan madu dari sarang lebah.
12 Lebé-lebé lagi, slórónyo tu peringetke aku, hamba Kau ni,
amen dengen nyagonyo ado pahalo yang besak.
13 Siapola yang pacak tau kesalahannyo dewek?
Mangko bersékela aku dari kesalahan yang tesingit tu.
14 Tahanla hamba Kau dari kesombongan;
jangan biarke pasal ni nguasoi aku.
Mangko aku jadi idak becacat,
trós bersé dari pelanggaran yang besak.
15 Kironyo omongan mólót aku jugo renóngan ati aku
disenengi ole Kau, ya ALLAH,
benteng petahanan akuc jugo penebós aku.