22
Doa pas kesaroan samo pujian pas diselametke
1 Catetan óntók pemémpén pujian: Saér ni dinyanyike pecak lagu “Ruso pas pajar”. Saér nyanyian Daód.
2 Ya Tuhanku! Ya Tuhanku! Ngapo Kau ninggalke aku?a
Petolongan Kau jaó dari aku,
jaó dari pekék'an-pekék'an aku.
3 Ya Tuhanku! Aku bejerét pas siang ari
tapi Kau idak nyawab,
jugo pas malem ari,
tapi katek ketenangan óntók aku.
4 Mugola cak itu, Kau tu suci.
Kau tinggal dalem puji-pujian Israel.
5 Samo Kaula nenek moyang kami pecayo;
dio wong pecayo, trós Kau ngelepaske dio wong.
6 Samo Kaula dio wong bejerét, trós dibebaske.
Samo Kau dio wong pecayo, trós dio wong idak dikecewake.
7 Tapi aku ni ulet, bukan wong,
yang dihino manusio, trós direndake wong banyak.
8 Slóró wong yang jingok aku ngato-ngatoi aku;
dio wong cébérke bébér, gelengke palak.
9 Uji wong-wong tu, “Dio, kan, besera samo ALLAH,
mangko biarkela Allah yang ngelepaskenyo!
Biarkela Dio yang nyelametkenyo!
Dio, kan, seneng samo wong tu!”
10 Tapi, Kaula yang metuke aku dari kandóngan.
Kau mbékén aku amanb di dado emak aku.
11 Sejak dari rahém, aku la diserake ke Kau.
Sejak dari perót emak aku, Kaula Tuhan aku.
12 Janganla jaó dari aku,
karno kesaroan la parak
trós katek yang nolong.
13 Banyak sapi lanang ngeléléngi aku;
sapi-sapi kuat dari Basanc ngepóng aku.
14 Dio wong mbukak mólótnyo ngadepi aku,
pecak singo yang nerkem trós ngaóm.
15 Kekuatan aku tekuras pecak banyu yang tumpa;
slóró tulang aku pecól dari sendinyo.
Ati aku pecak lélén,
melele di jeró dado aku.
16 Tenago aku abés, tekeréng pecak beléng.
Jugo lida aku keréng nian sampe saro negok.d
Di jeró liang kóbór,e Kau narok aku.
17 Pecak anjéng-anjéng yang ngeróbóngi aku,
gerombolan wong jahat ngepóng aku.
Dio wong ngelukoif tangan samo sekel aku.
18 Aku pacak étóng slóró tulang aku.
Dio wong nyingok'i trós masati aku.
19 Dio wong mbagéke pakean aku di antaro dio wong dewek,
mala ngoncang undi óntók ndapetke baju aku.
20 Tapi Kau, ya ALLAH, janganla jaó!
Ya Kekuatan aku, gancangla tolong aku!
21 Selametkela nyawo aku dari pedang,
édóp aku dari cengkeman anjéng!
22 Selametkela aku dari mólót singo,
dari tandók banteng!
Kau la mbebaske aku!
23 Aku bakal nyeritoke namo baék Kau samo dólór-dólór seiman aku.
Di tenga-tenga jemaah, aku bakal muji Kau.
24 Ói wong-wong yang tóndók dengen takjób samo ALLAH, pujila Dio!
Ói slóró bani Yakób, mulyokela Dio!
Segenla samo Dio, ói slóró ketórónan Israel!
25 Soalnyo Dio idak ngerendake trós idak nganggep najés pendritoan wong yang saro.
Dio idak nyingitke rai-Nyo dari wong tu.
Dio ndenger pas wong tu bejerét mintak tolong samo Dio.
26 Karno Kau, aku muji-muji dalem jemaah yang besak.
Aku nak mbayar najar aku di adepan wong-wong yang tóndók dengen takjób samo Dio.
27 Wong yang saro bakal makan trós jadi kenyang.
Wong yang atinyo nyari ALLAH bakal muji Dio.
Biarla ati kamu benyalo-nyalo selamonyo!
28 Slóró dunio sampe ójóng bumi bakal teinget trós bebalék ke ALLAH.
Slóró suku bangso bakal sójód nyemba di adepan-Nyo.
29 Soalnyo ALLAH bae yang bekuaso.
Dio mrénto bangso-bangso.
30 Slóró wong yang édópnyo lemak di dunio ni bakal makan trós sójód nyemba Dio.
Slóró wong yang tórón ke jeró liang kóbórg bakal tóndók di adepan-Nyo,
iola wong-wong yang dak pacak manjangke édópnyo.
31 Anak cócóng bakal beibada samo Dio,
trós bakal nyeritoke pasal Tuan Yang Agóng samo angkatan yang bakal dateng.
32 Dio wong bakal dateng trós ngabarke keadélan-Nyo
samo bangso yang bakal laér kagek,
amen Diola yang ngelakukenyo.