24
Kedatengan Allah ke jeró Ruma Agóng-Nyo di bumi
1 Saér nyanyian Daód.
Bumi jugo slóró isinyo iola kepunyoan ALLAH,
dunio jugo slóró yang tinggal di dalemnyo.
2 Soalnyo Dio yang la mbangón bumi tu
di pócók laótan,
trós negakkenyo di pócók arós-arós yang dalem.
3 Siapo yang bole naék ke bókét ALLAH?
Siapo yang bole tegak di tempat-Nyo yang suci?
4 Wong yang tangannyo bersé jugo atinyo murni,
yang idak ngenjókke dirinyo óntók penipuan,
trós yang idak besumpa palsu.
5 Dio bakal nerimo berkah dari ALLAH,
trós pembelaan dari Tuhan, penyelametnyo.
6 Inila angkatan wong-wong yang nyari Dio,
yang nyari hadérat Tuhannyo Yakób. Selah
7 Angkatla palak kau, ói lawang-lawang gerbang!a
Teangkatla, ói lawang-lawang yang la beabad-abad!
Supayo Rajo Yang Maha Mulyo masók!
8 Siapo Rajo Yang Maha Mulyo tu?
ALLAH yang kuat jugo perkasa!
ALLAH yang perkasa dalem peperangan!
9 Angkatla palak kau, ói lawang-lawang gerbang!
Teangkatla, ói lawang-lawang yang la beabad-abad!
Supayo Rajo Yang Maha Mulyo masók!
10 Siapo Rajo Yang Maha Mulyo tu?
ALLAH, Tuan Semesto Alam,
Diola Rajo Yang Maha Mulyo! Selah