36
Kejahatan wong beduso jugo kasé stio Allah
1 Catetan óntók pemémpén pujian: Saér nyanyian ni dari Daód, hamba ALLAH.
2 Duso bebésék di jeró ati wong jahat;a
katek raso takót samo Allah di matonyo.b
3 Iyo, kehebatannyo dewek yang ditinggike di matonyo tu,
sampe-sampe dio dak pacak nyingok kesalahannyo
apolagi mbencinyo.
4 Omongan mólótnyo iola kejahatan jugo tipuan;
dio idak lagi bebuat bijak jugo baék.
5 Kejahatan direncanokenyo di tempat tédók.
Dio nempatke dirinyo di jalan yang idak baék,
trós kekejeman idak ditolaknyo.
6 Ya ALLAH, kasé Kau sampe ke langét;
kestioan Kau sampe ke awan-awan.
7 Kebeneran Kau pecak gónóng-gónóng yang paléng tinggi;
keadélan Kau pecak laótan tedalem.
Manusio samo binatang Kau piaro, ya ALLAH.
8 Alangke beregonyo kasé stio Kau, ya Tuhan!
Anak-anak manusio beléndóng di bawa dekepan sayap Kau.
9 Dio wong kenyang dengen pajóan mewa dari ruma Kau,
trós Kau ngenjók dio wong minum dari sungi kebaék'an Kau.
10 Soalnyo mato banyu keédópan ado samo Kau,
trós dalem cahayo Kau kami nyingok terang.
11 Alérkela kasé stio Kau ke wong yang ngenal Kau,
jugo kebeneran Kau ke wong yang lórós ati.
12 Jangan biarke sekel wong sombong nginjek aku,
apo tangan wong jahat ngósér aku.
13 Jingokla! Wong-wong yang bebuat jahat tu nyampak;
dio wong dibanténg trós idak pacak bangón lagi.