42
Di tenga pegómólan, jiwo yang teteken nemuke arepan dalem Allaha
1 Catetan óntók pemémpén pujian: Saér nyanyian ni iola maskilb dari bani Korah.c
2 Pecak ruso ngerinduke banyu sungi,
pecak itula jiwo aku ngerinduke Kau, ya Allah.
3 Jiwo aku aós samo Allah, Tuhan yang édóp.
Kapan aku dateng lagi ke Ruma Agóng Allah trós masók ke hadérat-Nyo?
4 Banyu mato aku jadi pajóan aku siang malem,
pas dikatoke terós-terósan ke aku cak ini, “Di mano Tuhan kau?”
5 Inila yang aku inget pas numpake isi ati ke diri aku dewek:
amen dulu tu aku galak bejalan besamo wong banyak;
aku mémpén arak-arak'an nuju Ruma Agóng Allah
dengen sorak'an jugo ucapan sókór,
dalem keramean wong yang ngadoke pesta ari rayo.
6 Ói jiwo aku, ngapo kau teteken trós ancór di dalem aku?
Bearepla samo Allah!
Soalnyo aku bakal besókór lagi samo Dio,
karno petolongan yang dateng dari adepan-Nyo!
7 Ya Tuhanku, jiwo aku teteken di dalem aku.
Karno tu, aku nginget Kau
dari daera Sungi Yordan jugo Pegónóngan Hermon,
dari Gónóng Mijar.d
8 Laótan manggél laótan dengen gemóró banyu terjón Kau.
Slóró ombak jugo gelombang Kau nerjang aku.
9 Pas siang ari ALLAH ngótós kasé stio-Nyo,
trós pas malem ari nyanyian-Nyo nyertoi aku,
sikok doa ke Tuhan keédópan aku.
10 Aku nak ngomong samo Allah, benteng petahanan aku,e
“Ngapo Kau ngelupoke aku?
Ngapo aku harós bejalan dalem kegelepan karno penindesan mósó?”
11 Pecak tujahan ke dalem tulang-tulang aku,
mósó-mósó ngejek'i aku.
Siang malem dio wong ngomong samo aku, “Di mano Tuhan kau?”
12 Ói jiwo aku, ngapo kau teteken?
Ngapo kau ancór di dalem aku?
Bearepla samo Allah!
Soalnyo aku bakal besókór lagi samo Dio,
penolong aku jugo Tuhan aku.