48
Sion, kota Allah
1 Nyanyian. Saér nyanyian bani Korah.a
2 Besakla ALLAH jugo tepuji nian
di kota Tuhan kito, bókét-Nyo yang suci.
3 Cindó menjulang, kesenengan óntók slóró bumi,
itula bókét Sion, yang iola kota Rajo Besak,
yang ado di ójóng sebela utara!b
4 Allah ado di jeró benteng-bentengnyo.
Dio la ngenalke diri jadi tempat peléndóngan yang tinggi.
5 Soalnyo jingokla! Rajo-rajo bekómpól.
Dio wong serempak nyerbu.
6 Dio wong jingok, abés tu tepelongok.
Dio wong panik,
trós lari ketakótan.c
7 Dio wong gemeter ketakótan di sano,
trós kesakétan nian pecak betino yang nak beranak.
8 Dengen angin timur
Kau ngancórke kapal-kapal Tarsis.d
9 Pecak yang dulu kito denger, sekarang kito la nyingok,
di kota ALLAH, Tuan Semesto Alam,
di kota Tuhan kito.
Allah negóke kota tu óntók selamo-lamonyo. Selah
10 Ya Allah, kami nginget kasé stio Kau
di jeró Ruma Agóng Kau.
11 Samo pecak namo baék Kau, ya Allah,
cak itu jugo puji-pujian óntók Kau sampe ke ójóng-ójóng bumi.
Tangan kanan Kau penu keadélan.
12 Biarkela Bókét Sion beseneng;
biarkela dósón-dósón Yudae besorak-sorak
karno kepótósan pengadélan Kau.f
13 Payó! Bejalanla muteri Sion, trós keléléngila dio.
Étóngla menara-menaranyo.
14 Pasatila tembok-temboknyo,
liwatla di antaro benteng-bentengnyo,
supayo kamu pacak nyeritokenyo samo angkatan berékótnyo.
15 Sebenernyo, inila Allah,
Tuhan kito óntók seterósnyo jugo selamo-lamonyo!
Diola yang bakal mémpén kito sampe selesai!g