49
Kesio-sioan harto kekayoan
1 Catetan óntók pemémpén pujian: Saér ni dari bani Korah.a Saér nyanyian.
2 Dengerkela ini, ói slóró bangso!
Pasangla kópéng, ói slóró pendódók dunio!
3 Baék wong hino jugo wong mulyo,
wong kayo jugo wong méskén, segalonyo!
4 Mólót aku bakal ngucapke hikmah,
trós ati aku bakal nyampeke pengertian.
5 Aku bakal masang kópéng óntók peumpamoan,
aku bakal benyanyi nyelaske pribahaso aku, makek kecapi.
6 Ngapo aku harós takót pas waktu kesaroan,
pas aku dikepóng ole kejahatan wong-wong yang nipu aku,*
7 iyo, ole wong yang ngandalke hartonyo,
trós nyombongke kelimpahan kekayoan dirinyo dewek?
8 Katek siapo bae yang pacak nebós nyawo wong;
dak pacak mbayar ke Allah óntók gantikenyo.
9 Rego tebósan nyawo manusio mahal nian,
bayaran apo bae dak bakal perna cókóp
10 óntók édóp selamonyo,
óntók idak nyingok liang kóbór.
11 Iyo, wong tu bakal nyingok amen wong bijak jugo mati,
trós wong tekak samo wong buyan samo-samo mati.
Dio wong galo ninggalke harto bendonyo óntók wong laén.
12 Kóbóranla yang jadi ruma dio wong* óntók selamo-lamonyo,
iola tempat tinggal dio wong dari jaman ke jaman.
Wong namoi lahan-lahan méléknyo makek namo dewek,
13 tapi, manusio dengen slóró kekayoannyo idak bakal nginep lamo di bumi.
Dio diumpamoke pecak binatang yang dibinasoke.
14 Cak inila jalan wong-wong tu,
jalan wong-wong yang tekak
jugo pengékótnyo yang seneng samo omongannyo. Selah
15 Dio wong pecak kambéng domba yang nuju kematian,
maótla yang géréng dio wong.
Dio wong bakal dikuasoi wong-wong yang lórós ati pas pagi ari,b
trós badan dio wong bakal mbusuk di liang kóbór,
jaó dari ruma mewa dio wong.*
16 Tapi, Allah yang bakal nebós nyawo aku
dari genggeman maót,
soalnyo Allah bakal narék aku. Selah
17 Jangan takót pas ado wong jadi kayo,
pas harto* kluargonyo betamba,
18 karno pas dio mati, galo-galonyo tu dak bakal digawaknyo,
trós hartonyo dak bakal tórón melok'inyo.
19 Mugola selamo édópnyo dio nganggep dirinyo diberkahi,
trós memang wong muji kito pas kito berasél,
20 tapi dio bakal nyósól angkatan nenek moyangnyo.
Dio wong dak bakal nyingok terang lagi.
21 Manusio dengen slóró kekayoannyo katek pengertian*.
Dio diumpamoke pecak binatang yang dibinasoke.