50
Ibada yang dipéngéni Allah
1 Saér nyanyian Asafa
Yang Maha Besak bepirman;
Tuhan ALLAH manggél bumi,
dari terbétnyo matoari sampe tebenemnyo.
2 Dari Sion, yang sempurno kecindóannyo,
Allah nampakke diri dengen becahayo.
3 Tuhan kito dateng trós idak tinggal diem.
Di adepan-Nyo ado api yang benyalo-nyalo,
di sekeléléng-Nyo ado badai besak.
4 Dio manggél langét di pócók samo bumi jugo,
óntók jadi saksi pas Dio ngadéli umat-Nyo.
5 Uji Allah,
“Kómpólkela wong-wong além-Ku di adepan Aku,
iola wong-wong yang ngiket pejanjian dengen Akub liwat kórban sembeléhan.”
6 Langét nyatoke keadélan-Nyo,
soalnyo Allah dewekla Hakém. Selah
7 Uji Allah lagi,
“Dengerla, ói umat Aku, Aku nak ngomong!
Ói Israel, Aku nak besaksi nódó kamu!
Akula Allah, Tuhan kamu!
8 Bukan karno kórban-kórban sembeléhan kamu Aku negor kamu,
jugo bukan karno kórban bakaran kamu yang terós-terósan ado di adepan Aku.
9 Aku dak bakal ngambék sapi dari ruma kamu,
apo kambéng dari kandang kamu,
10 soalnyo punyo Akula segalo binatang di utan,
cak itu jugo ternak di ribuan bókét.
11 Aku ngenal slóró bóróng di pegónóngan,
jugo slóró mahlók yang begerak di padang iola punyo Aku.
12 Seandainyo Aku laper, Aku dak bakal ngomongkenyo samo kamu,
soalnyo punyo Akula bumi dengen segalo isinyo.
13 Apo Aku ni makan dagéng sapi?
Apo Aku ni minum dara kambéng?
14 Tapi sembakela kórban sókórc ke Allah,*
trós bayarla najar kamu ke Yang Maha Besak!
15 Bejerétla ke Aku pas lagi saro!
Aku bakal ngelepaske kamu,
trós kamu bakal mulyoke Aku.” Selah
16 Tapi ke wong jahat, Allah ngomong cak ini,
“Apo órósan kamu ngucapke peratóran-peratóran Aku
trós nyebót-nyebót pejanjian Aku dengen mólót kamu,
17 padahal kamu mbenci dédék'an,
trós mbuang pirman Aku di belakang kamu?
18 Amen kamu nyingok maléng, kamu bekawan samo dio,
trós samo wong yang bejina kamu begaól.
19 Mólót kamu dipakek óntók kejahatan,
trós lida kamu nyatu dengen kecalakan.
20 Kamu dódók trós ngato-ngatoi dólór kamu;
kamu mitna anak dari emak kamu dewek.
21 Itula yang kamu lakuke, tapi dulu Aku diem bae,
laju kamu mékér amen Aku ni samo pecak kamu.
Sekarang Aku bakal negor kamu
trós nóntót kamu di depan mato kamu.
22 Pékérkela slórónyo tu, ói kamu yang ngelupoke Allah,
supayo jangan sampe Aku ngoyak-ngoyak'i kamu,
trós katek yang ngelepaske.
23 Siapo bae yang nyembake kórban sókór,d
diola yang mulyoke Aku.
Siapo bae yang ngelóróske jalannyo,
ke diola bakal Aku tónjókke keselametan dari Allah.”