51
Doa mintak diampóni Allah
1 Catetan óntók pemémpén pujian: Saér nyanyian ni dari Rajo Daód, 2 pas Nabi Natan ndatenginyo abés Daód marak'i Batsyeba, bininyo Uria.a
3 Mura atila samo aku, ya Allah, nórót kasé stio Kau;
nórót belas kesian Kau yang besak, apóskela pelanggaran-pelanggaran aku!
4 Basóla aku nian-nian dari kesalahan aku;
sucikela aku dari duso aku.
5 Soalnyo aku nyadari pelanggaran-pelanggaran aku,
trós duso aku ado terós di adepan aku.
6 Samo Kau, samo Kau baela aku beduso,
trós di mato Kau aku la ngelakuke kejahatan;
mangko Kau bener pas Kau ngomong,
trós tólós pas Kau ngakémi.b
7 Sebenernyo, aku ni la besala sejak dilaérke,
mala sejak dikandóng emak aku, aku la beduso.c
8 Sebenernyo, kestioanla yang Kau senengi di jeró batén,d
trós Kau ngenjóktauke hikmah samo aku di jeró bagéan yang tesingit.e
9 Apóskela duso aku dengen percék'an banyu,f mangko aku jadi suci;
basóla aku, mangko aku jadi lebé póté dari salju.
10 Biarkela aku denger kemeriahan samo kesenengan;
biarkela tulang-tulang yang Kau remókke besorak.g
11 Paléngkela rai Kau dari duso-duso aku,
trós apóskela slóró kesalahan aku.
12 Ciptokela ati yang suci óntók aku, ya Allah,
trós barukela ro yang tegó di jeró batén aku.
13 Janganla buang aku dari hadérat Kau,
trós janganla ambék dari aku ro Kau yang suci.
14 Balékkela ke aku kesenengan yang dari keselametan Kau,
trós enjókkela aku ro keiklasan.
15 Mangko aku bakal ngajarke jalan Kau samo wong-wong yang ngelakuke pelanggaran,
trós wong-wong beduso tu bakal bebalék samo Kau.
16 Lepaskela aku dari utang dara,h
ya Allah, ya Tuhan keselametan aku,
mangko lida aku bakal besorak-sorak karno keadélan Kau.
17 Ya Tuan Yang Agóng, bukakkela bébér aku,
mangko mólót aku nyatoke puji-pujian samo Kau!
18 Soalnyo Kau idak ngendak'i kórban sembeléhan.
Sekironyo aku nyembake kórban bakaran, Kau dak seneng.
19 Kórban sembeléhan yang dikendak'i Allah iola jiwo yang ancór.
Ati yang ancór jugo remók dak bakal Kau hino, ya Allah.
20 Bebuat baékla samo Sion sesuai yang Kau senengi.
Bangónla tembok-tembok Yerusalem.
21 Mangko Kau bakal seneng nerimo kórban-kórban sembeléhan yang bener,
iola kórban bakaran yang ótó, yang ditunu sampe abés;
mangko sapi-sapi lanang bakal disembake di pócók mesba Kau.