84
Kangen Ruma Agóng Allah di Kota Yerusalem
1 Catetan óntók pemémpén pujian: Saér ni dinyanyike nórót gitit.a Saér nyanyian dari bani Korah.b
2 Alangke nyenengkenyo tempat Kau tinggal,
ya ALLAH, Tuan Semesto Alam!
3 Jiwo aku kangen samo halaman ALLAH,
sampe telesu karnonyo.
Jiwo rago aku nyorak-nyorak'i Tuhan yang édóp.
4 Mala bóróng pépét la dapet ruma,
trós bóróng layang-layang dapet sikok sarang óntók dirinyo,
tempat narok anak-anaknyo parak meja-meja pesembahan Kau,
ya ALLAH, Tuan Semesto Alam,
ya Rajo aku jugo Tuhan aku!
5 Senengla ati wong-wong yang ado terós di ruma Kau!
Dio wong terós-terósan muji Kau. Selah
6 Senengla ati wong-wong yang ndapetke kekuatannyo dari Kau,
yang atinyo kangen óntók ngelakuke pejalanan ke ruma Kau.c
7 Sementaro dio wong ngeliwati Lemba Bakka,d
dio wong mbékénnyoe jadi tempat yang bemato banyu,
malahan ujan di awal mósém nyelimutinyo dengen berkah.
8 Dio wong bejalan dalem kekuatan yang dak abés-abés,
ngadep Allah di Sion.
9 Ya ALLAH, Tuan Semesto Alam, dengerkela doa aku.
Peratikela, ya Tuhannyo Yakób! Selah
10 Jingokla rajo kami, iola tameng kami, ya Allah;
dengen kebaék'an Kau, pasatila rai wong yang Kau lanték!
11 Sebenernyo lebé baék seari bae di halaman Kau
daripado seribu ari di tempat laén.
Aku lebé galak tegak di lawang ruma Tuhan aku
daripado tinggal di ruma wong jahat.
12 Soalnyo Tuhan ALLAH iola matoari jugo tameng;f
ALLAH ngenjók karunio jugo kemulyoan;
Dio dak nahan kebaék'an dari wong yang bejalan dalem ketólósan.
13 Ya ALLAH, Tuan Semesto Alam,
senengla ati wong yang pecayo samo Kau!