98
Pujila Allah karno keselametan dateng dari-Nyo!
1 Saér nyanyian
Nyanyila óntók ALLAH sikok nyanyian baru,
soalnyo ajaéb nian pebuatan yang la dilakuke-Nyo!
Tangan-Nyo la gaweke keselametan,
iyo, tangan kanan-Nyo yang suci.
2 ALLAH la nónjókke keselametan dari-Nyo,
di depan mato bangso-bangso, Dio la mbukakke kebeneran-Nyo.
3 Dio inget kasé jugo kestioan-Nyo samo bani Israel;
slóró ójóng bumi la nyingok amen Tuhan kito nyelametke!
4 Besorak-sorakla óntók ALLAH, ói slóró bumi!
Besenengla, besorakla, trós nyanyikela puji-pujian!
5 Nyanyikela puji-pujian óntók ALLAH dengen kecapi,
dengen kecapi jugo pemaénan musik!
6 Dengen terompet jugo bunyi sangkakala,a
besorakla di adepan Rajo, iola ALLAH!
7 Biarla laót begemóró dengen segalo isinyo,
dunio dengen segalo yang tinggal di dalemnyo!
8 Biarla sungi-sungi betepók tangan,
Soalnyo Dio dateng óntók mrénto bumi.
Dio bakal mrénto dunio dengen kebeneran,
jugo suku bangso dengen keadélan.